Vidarbha Rain Update 9 July: विदर्भात पावसाचा तडाखा: गडचिरोलीला पुराचा धोका, गोसेखुर्द धरणाचे सर्व दरवाजे उघडले, अनेक मार्ग बंद

Vidarbha Rain Update 9 July: विदर्भात गेल्या दोन-तीन दिवसांपासून मुसळधार पावसाने हाहाकार माजवला आहे. विशेषतः पूर्व विदर्भातील गडचिरोली, भंडारा आणि गोंदिया जिल्ह्यांमध्ये पावसाचा जोर कायम आहे. सततच्या पावसामुळे नद्या, नाले आणि धरणे ओसंडून वाहत आहेत. अनेक ठिकाणी पूरसदृश परिस्थिती निर्माण झाली असून, वाहतूक मार्ग बंद झाले आहेत. प्रशासनाने नागरिकांना सतर्क राहण्याचे आवाहन केले आहे.

गडचिरोलीत पूराचा धोका

गडचिरोली जिल्ह्यात सोमवारपासून पावसाची संततधार सुरू आहे. वैनगंगा नदी धोक्याच्या पातळीवरून वाहत असून, देसाईगंज, गडचिरोली, चामोर्शी, अहेरी आणि सिरोंचा तालुक्यांमध्ये पूरपरिस्थितीचा धोका निर्माण झाला आहे. गोसेखुर्द धरणाचे सर्व 33 दरवाजे उघडण्यात आले असून, सध्या सुमारे 3.5 लाख क्युसेक पाण्याचा विसर्ग सुरू आहे. हे पाणी गडचिरोलीत सायंकाळपर्यंत पोहोचण्याची शक्यता आहे, त्यामुळे नदीकाठच्या गावांना सतर्कतेचा इशारा देण्यात आला आहे. सोमवारी रेड अलर्ट आणि मंगळवारी ऑरेंज अलर्ट जारी करण्यात आला आहे.

जिल्ह्यातील 10 प्रमुख मार्ग पूरामुळे बंद झाले आहेत. यामध्ये कुरखेडा-मालेवाडा राज्यमार्ग, कोरची-बोटेकसा-भीमपूर, कुरखेडा-वैरागड, मांगदा-कलकुली, कढोली-उराडी, चातगाव-रांगी-पिसेवाडा, गोठनगडी-चांदागड-सोनसरी, कुरखेडा-तळेगाव-चारभट्टी, आंधळी-नैनपुर आणि शंकरपूर-जोगीसाखरा-कोरेगाव चोप यांचा समावेश आहे. काही ठिकाणी रस्ते वाहून गेले असून, काही ठिकाणी पुलांवर पाणी आले आहे.

गोसेखुर्द धरणाचे सर्व दरवाजे उघडले

भंडारा जिल्ह्यातील गोसेखुर्द धरणाच्या पाणलोट क्षेत्रात मागील रात्रीपासून पाऊस पडत आहे. धरणाची पाणीपातळी नियंत्रित ठेवण्यासाठी प्रशासनाने सर्व 33 दरवाजे उघडले आहेत. सध्या 2.83 लाख क्युसेक पाण्याचा विसर्ग सुरू असून, मध्यप्रदेश आणि धरणाच्या पाणलोट क्षेत्रात पावसाचा जोर कायम राहिल्यास हा विसर्ग आणखी वाढण्याची शक्यता आहे. नदीकाठच्या गावांना आणि नदीपात्रातून ये-जा करणाऱ्या नागरिकांना सतर्क राहण्याच्या सूचना देण्यात आल्या आहेत.

गोंदिया आणि भंडाऱ्यात वाहतूक ठप्प

गोंदिया जिल्ह्यात पावसामुळे 21 मार्ग बंद झाले आहेत. यामध्ये मोरगाव अर्जुनी तालुक्यातील 10, देवरी तालुक्यातील 10 आणि गोंदिया तालुक्यातील 1 मार्गाचा समावेश आहे. नदी-नाल्यांच्या पाणीपातळीत वाढ झाल्याने अनेक पुलांवर पाणी आले आहे. जिल्हा प्रशासनाने ऑरेंज अलर्ट जारी केला असून, नागरिकांना सतर्क राहण्याचे आवाहन केले आहे.

सिंदखेड राजात १४ जुलैला जनआक्रोश मोर्चा; महाविकास आघाडीची तयारी जोमात..!

भंडारा जिल्ह्यात गेल्या 36 तासांपासून पावसाने नदी-नाले ओसंडून वाहत आहेत. यामुळे 13 रस्ते वाहतुकीसाठी बंद करण्यात आले आहेत. तुमसर तालुक्यात 8, मोहाडी तालुक्यात 3 आणि भंडारा तालुक्यात 2 रस्ते बंद आहेत. प्रशासनाने नदीकाठच्या गावांना सतर्कतेचा इशारा दिला आहे.

हवामान विभागाचा इशारा

हवामान विभागाने विदर्भातील काही जिल्ह्यांसाठी 9 जुलैसाठी रेड आणि ऑरेंज अलर्ट जारी केला आहे. भंडारा, गोंदिया आणि नागपूरसाठी रेड अलर्ट, तर अमरावती, वर्धा, चंद्रपूर आणि गडचिरोलीसाठी ऑरेंज अलर्ट आहे. काही ठिकाणी गडगडाटी वादळासह मुसळधार पावसाची शक्यता आहे.

प्रशासनाचे आवाहन

जिल्हा प्रशासन आणि धरण प्रशासनाने नागरिकांना नदीपात्रात जाणे टाळण्यास सांगितले आहे. पूरपरिस्थितीमुळे अडकलेल्या नागरिकांसाठी बचाव आणि मदत कार्य सुरू आहे. गडचिरोली, गोंदिया आणि भंडारा प्रशासन अलर्ट मोडवर आहे. नागरिकांनी अफवांवर विश्वास ठेवू नये आणि प्रशासनाच्या सूचनांचे पालन करावे, असे आवाहन करण्यात आले आहे.

Mumbai Road Project: हाजी अली ते परळ ५ मिनिटांत: ३०० कोटींचा उन्नत रस्ता प्रकल्पाला मंजुरी

विदर्भातील नागरिकांनी सतर्क राहून प्रशासनाच्या सूचनांचे पालन करावे, जेणेकरून कोणतीही अनुचित घटना टळेल.